Malia a defensa de valores como a liberdade, a igualdade ou a intimidade persisten na nosa sociedade prácticas de exclusión, marxinación ou inxustiza que afectan ás persoas usuarias dos servizos sociais e mais aos profesionais, familiares e a toda a comunidade. Promover aqueles valores e corrixir estas prácticas é un dos obxectivos dunha intervención social de calidade, que debe combinar a competencia técnica coa excelencia ética.
Na procura desta calidade nos servizos sociais comunitarios dos concellos que o integran, o Consorcio As Mariñas aposta pola formación bioética do seu persoal, en colaboración co Grupo de investigación Filosofía, Constitución e Racionalidade da Universidade da Coruña, cara a creación dun Comité de Ética dos Servizos Sociais na comarca que facilite a toma de decisións e contribúa á implantación dunha cultura bioética na intervención diaria destes equipos técnicos.
Paralelamente, para transmitir á cidadanía a importancia da Bioética e compartir experiencias similares doutras Comunidades Autónomas, ambos organizan en colaboración coa Fundación Paideia Galiza este ciclo de tres conferencias sobre Bioética nos Servizos Sociais.
Begoña Román Maestre
Doutora en Filosofía e Profesora de Filosofía (Universidad de Barcelona).
Presidenta do Comité de Ética de Servicios Sociales de Cataluña e vogal do Comité de Bioética de Cataluña.
Entre as súas últimas publicacións destacan «Ética de los servicios sociales» (Barcelona, Herder, 2016) e «¿Quo vadis, Universidad?» (Barcelona, UOC, 2016), en colaboración con Francisco Esteban.
Mónica Forteza Monfort
Licenciada en Psicología (UNED). Máster en Dependencia y Discapacidad (UNED)
Especialista en Promoción de la Autonomía Personal y Espacios Accesibles.