27 Nov A Fundación Paideia e a Consellería do Medio Rural xuntos para a mellora xenética de frondosas autóctonas

A sede da Fundación Paideia Galiza acolleu a Xornada “Escollendo, mellorando e conservando as nosas árbores”.

O evento foi organizado o pasado 7 de novembro pola Fundación Paideia Galiza en colaboración coa Consellería do Medio Rural da Xunta de Galicia.

O obxectivo da sesión foi reforzar a aposta que as dúas institucións teñen pola produción de especies autóctonas. A finalidade é cubrir as demandas do sector forestal galego e contribuír a diminuír a dependencia externa na comercialización destas especies, procedentes doutros países da Unión Europea.

O acto estivo presidido polo conselleiro do Medio Rural da Xunta de Galicia, José González Vázquez. Acompañouno Guillermo Vergara Muñoz, vicepresidente da Fundación Paideia Galiza.

Participaron tamén diferentes expertos no sector:

• Mariano Toribio Iglesias, ex-investigador do Instituto Madrileño de Investigación e Desenvolvemento Rural, Agrario e Alimentario (IMIDRA).
• Felipe Pérez Martín, xefe de área de Recursos Xenéticos Forestais da Dirección Xeral de Desenvolvemento Rural, Innovación e Política Forestal do Ministerio de Agricultura, Pesca e Alimentación.
• Margarita Fraga Ares, directora técnica de Cultigar.
• José Martel Muñoz – Cobos, do Servizo de Saúde e Vitalidade do Monte da Dirección Xeral de Planificación e Ordenación Forestal da Consellería do Medio Rural.
• Juan Majada Guijo, director científico do Centro Tecnolóxico Forestal e da Madeira – Fundación CETEMAS e do
• Francisco Dans del Valle, director da Asociación Forestal de Galicia (AFG).

A xornada estivo conducida polo presentador da TVG, Rodrigo Vázquez Rodríguez.

Convenio entre a Fundación Paideia Galiza e a Consellería do Medio Rural

Este evento forma parte das diferentes accións subscritas no marco do convenio firmado hai un ano entre a Consellería do Medio Rural e a Fundación Paideia Galiza.

O convenio contempla que o laboratorio de biotecnoloxía vexetal de Galicia (Cultigar), conxuntamente con persoal técnico e científico especializado da Consellería, leve  a cabo novos clons seleccionados de cerdeira Prunus avium e a selección de 20 xenotipos de carballos recollidos en diferentes puntos de Galicia para escoller os que presenten mellores características forestais.

Deste xeito abastecerase ó sector de planta de calidade, que poderá ser empregada nos montes galegos e garantir a xeración de recursos para os seus propietarios e para a industria.